apne ghamon ki baat nahin hai hansi ki baat

apne ġhamoñ kī baat nahīñ hai hañsī kī baat

is rang meñ bhī karte haiñ ham zindagī kī baat

dānishvaroñ kī bazm meñ logo kahāñ chale

lo merī vahshatoñ se suno āgahī kī baat

ahl-e-ḳhirad pe farz huā sajda-e-junūñ

mahfil meñ jab chhiḌī mirī dīvāngī kī baat

barbād haiñ bagūle pareshāñ shamīm-e-gul

pahuñchī kahāñ kahāñ tirī āvārgī kī baat

kyā kyā zamāna mujh pe lagā.e na tohmateñ

lahja badal ke kah duuñ agar aap hī kī baat

hai apnī apnī sab ko hī 'bismil' paḌī huī

suntā nahīñ hai ġhaur se koī kisī kī baat

apne ghamon ki baat nahin hai hansi ki baat

is rang mein bhi karte hain hum zindagi ki baat

danishwaron ki bazm mein logo kahan chale

lo meri wahshaton se suno aagahi ki baat

ahl-e-KHirad pe farz hua sajda-e-junun

mahfil mein jab chhiDi meri diwangi ki baat

barbaad hain bagule pareshan shamim-e-gul

pahunchi kahan kahan teri aawargi ki baat

kya kya zamana mujh pe lagae na tohmaten

lahja badal ke kah dun agar aap hi ki baat

hai apni apni sab ko hi 'bismil' paDi hui

sunta nahin hai ghaur se koi kisi ki baat