apne ghar ki khiDki se main aasman ko dekhunga

apne ghar kī khiḌkī se maiñ āsmān ko dekhūñgā

jis par terā naam likhā hai us taare ko DhūñDūñgā

tum bhī har shab diyā jalā kar palkoñ kī dahlīz pe rakhnā

maiñ bhī roz ik ḳhvāb tumhāre shahr kī jānib bhejūñgā

hijr ke dariyā meñ tum paḌhnā lahroñ kī tahrīreñ bhī

paanī kī har satr pe maiñ kuchh dil kī bāteñ likkhūñgā

jis tanhā se peḌ ke nīche ham bārish meñ bhīge the

tum bhī us ko chhū ke guzarnā maiñ bhī us se lipTūñgā

ḳhvāb musāfir lamhoñ ke haiñ saath kahāñ tak jā.eñge

tum ne bilkul Thiik kahā hai maiñ bhī ab kuchh sochūñgā

bādal oḌh ke guzrūñgā maiñ tere ghar ke āñgan se

qaus-e-quzah ke sab rañgoñ meñ tujh ko bhīgā dekhūñgā

be-mausam bārish kī sūrat der talak aur duur talak

tere dayār-e-husn pe maiñ bhī kin-min kin-min barsūñgā

sharm se dohrā ho jā.egā kaan paḌā vo bundā bhī

bād-e-sabā ke lahje meñ ik baat meñ aisī pūchhūñgā

safha safha ek kitāb-e-husn sī khultī jā.egī

aur usī kī lai meñ phir maiñ tum ko azbar kar lūñgā

vaqt ke ik kankar ne jis ko aksoñ meñ taqsīm kiyā

āb-e-ravāñ meñ kaise 'amjad' ab vo chehrā joḌūñgā

apne ghar ki khiDki se main aasman ko dekhunga

jis par tera nam likha hai us tare ko DhunDunga

tum bhi har shab diya jala kar palkon ki dahliz pe rakhna

main bhi roz ek KHwab tumhaare shahr ki jaanib bhejunga

hijr ke dariya mein tum paDhna lahron ki tahriren bhi

pani ki har satr pe main kuchh dil ki baaten likkhunga

jis tanha se peD ke niche hum barish mein bhige the

tum bhi us ko chhu ke guzarna main bhi us se lipTunga

KHwab musafir lamhon ke hain sath kahan tak jaenge

tum ne bilkul Thik kaha hai main bhi ab kuchh sochunga

baadal oDh ke guzrunga main tere ghar ke aangan se

qaus-e-quzah ke sab rangon mein tujh ko bhiga dekhunga

be-mausam barish ki surat der talak aur dur talak

tere dayar-e-husn pe main bhi kin-min kin-min barsunga

sharm se dohra ho jaega kan paDa wo bunda bhi

baad-e-saba ke lahje mein ek baat mein aisi puchhunga

safha safha ek kitab-e-husn si khulti jaegi

aur usi ki lai mein phir main tum ko azbar kar lunga

waqt ke ek kankar ne jis ko akson mein taqsim kiya

aab-e-rawan mein kaise 'amjad' ab wo chehra joDunga