apne ghar mein dip jalana bhul gae

apne ghar meñ diip jalānā bhuul ga.e

bachchoñ ko tahzīb sikhānā bhuul ga.e

talvāroñ kī ārā.ish kā mausam thā

kamre meñ gul-dān sajānā bhuul ga.e

ḳhud se milne kī chāhat meñ the masrūf

ham duniyā ko phir apnānā bhuul ga.e

fāsla us ne rakh chhoḌā thā apne biich

ham bhī us se haath milānā bhuul ga.e

maujoñ kā kuchh lutf-o-karam hī aisā thā

ham kashtī sāhil par laanā bhuul ga.e

tanhā.ī kā bojh hai apne shānoñ par

ḳhud ko ye ehsās dilānā bhuul ga.e

sūkhī dhartī apnī kokh se kyā degī

bādal ab ke jal barsānā bhuul ga.e

'ḳhālid' aksar raat milī fōTpāthoñ par

ham ḳhvāboñ se aañkh milānā bhuul ga.e

apne ghar mein dip jalana bhul gae

bachchon ko tahzib sikhana bhul gae

talwaron ki aaraish ka mausam tha

kamre mein gul-dan sajaana bhul gae

KHud se milne ki chahat mein the masruf

hum duniya ko phir apnana bhul gae

fasla us ne rakh chhoDa tha apne bich

hum bhi us se hath milana bhul gae

maujon ka kuchh lutf-o-karam hi aisa tha

hum kashti sahil par lana bhul gae

tanhai ka bojh hai apne shanon par

KHud ko ye ehsas dilana bhul gae

sukhi dharti apni kokh se kya degi

baadal ab ke jal barsana bhul gae

'KHalid' aksar raat mili fooTpathon par

hum KHwabon se aankh milana bhul gae