apne ghar se mere ghar tak kuchh lamhon mein aaega

apne ghar se mere ghar tak kuchh lamhoñ meñ aa.egā

itnī masāfat meñ logoñ ko kitne rang dikhā.egā

dhuup thī sarsoñ kī kyārī meñ donoñ mil kar so.e the

ye manzar bhī saath hamāre dar dar Thokar khā.egā

phir vo shā.ir raat ga.e us shahr meñ tanhā phirtā hai

us ko kahnā sabr kare milne kā mausam aa.egā

saarī raat vo saath rahe saa.e kī tarah ham se duur

ham bhī saath lage rahte haiñ kabhī to mil hī jā.egā

raat kī kaalī chādar le kar din bhar so.e rahte haiñ

dekheñ kab vo sūraj ban kar hameñ jagāne aa.egā

apne ghar se mere ghar tak kuchh lamhon mein aaega

itni masafat mein logon ko kitne rang dikhaega

dhup thi sarson ki kyari mein donon mil kar soe the

ye manzar bhi sath hamare dar dar Thokar khaega

phir wo shair raat gae us shahr mein tanha phirta hai

us ko kahna sabr kare milne ka mausam aaega

sari raat wo sath rahe sae ki tarah hum se dur

hum bhi sath lage rahte hain kabhi to mil hi jaega

raat ki kali chadar le kar din bhar soe rahte hain

dekhen kab wo suraj ban kar hamein jagane aaega