اپنے گھر سے وہ مرے گھر آ گیا

اپنے گھر سے وہ مرے گھر آ گیا

چاند آخر حد کے باہر آ گیا

خط پہنچ سکتا ہے اب امید ہے

اس کا پتھر میری چھت پر آ گیا

وہ خفا تو ہے مگر زیادہ نہیں

دے کے خط زندہ کبوتر آ گیا

رات مجھ کو خواب پر حیرت ہوئی

ہاتھ پھیلائے سمندر آ گیا

تو بھی قاصد آج کل پاگل ہے کچھ

کس کا خط تھا کس کو دے کر آ گیا

جاگتے گزری نہ ہو اس کی بھی رات

میں خدا حافظ تو کہہ کر آ گیا

بند مٹھی اپنی انورؔ کھل گئی

سامنے جب بھی سکندر آ گیا