apne guman-e-tark-e-mohabbat ko kya hua

apne gumān-e-tark-e-mohabbat ko kyā huā

phir sāmne hai ek badan sochtā huā

ye pairahan ye zulf ye nazroñ kī ehtiyāt

ham ḳhush-nasīb haiñ ki tirā sāmnā huā

ham par to ḳhair ek qayāmat guzar ga.ī

tere mizāj se bhī jahāñ āshnā huā

kākul-badosh aaj vo sargarm-e-bahs haiñ

dil kī muvāfaqat meñ koī faisla huā

nā-puḳhtagī-e-ishq ke ġham bhī guzar ga.e

us bā-vafā pe aaj yaqīn-e-vafā huā

phir qatl-gah meñ zīnat-e-dār-o-rasan huī

phir sharh-e-ārzū kā kahīñ hausla huā

'saifī' hameñ aziiz thā kuchh itnā rāz-dāñ

vo shoḳh ḳhush-dimāġh bhī ham se ḳhafā huā

apne guman-e-tark-e-mohabbat ko kya hua

phir samne hai ek badan sochta hua

ye pairahan ye zulf ye nazron ki ehtiyat

hum KHush-nasib hain ki tera samna hua

hum par to KHair ek qayamat guzar gai

tere mizaj se bhi jahan aashna hua

kakul-badosh aaj wo sargarm-e-bahs hain

dil ki muwafaqat mein koi faisla hua

na-puKHtagi-e-ishq ke gham bhi guzar gae

us ba-wafa pe aaj yaqin-e-wafa hua

phir qatl-gah mein zinat-e-dar-o-rasan hui

phir sharh-e-arzu ka kahin hausla hua

'saifi' hamein aziz tha kuchh itna raaz-dan

wo shoKH KHush-dimagh bhi hum se KHafa hua