apne haalat ka asir hun main

apne hālāt kā asiir huuñ maiñ

dard kī daulat-e-kasīr huuñ maiñ

jam.a kar kar ke apnī mahrūmī

ban gayā kis qadar amiir huuñ maiñ

mere zāhir ko dekhne vaale

ek bātin ġhanī faqīr huuñ maiñ

aazmā le tū jis tarah chāhe

huuñ to kam-māya bā-zamīr huuñ maiñ

tū hai anvār-e-be-karāñ tū batā

kis kā ik pāra-e-munīr huuñ maiñ

ye savāl ab tire bachāo kā hai

terī khīñchī agar lakīr huuñ maiñ

koī harf-e-talab na harf-e-savāl

aisā ik boriyā-pazīr huuñ maiñ

terī kirnoñ ne tarbiyat kī hai

maanā ik zarra-e-haqīr huuñ maiñ

ḳhatm mujh par hai infirād mirā

aap apnī hī ik nazīr huuñ maiñ

ek tahzīb ke sahīfe kā

shāyad ab hissa-e-aḳhīr huuñ maiñ

'tarzī' kartā huuñ phir rafū dāman

ya.anī ik said-e-tark-o-gīr huuñ meñ

apne haalat ka asir hun main

dard ki daulat-e-kasir hun main

jama kar kar ke apni mahrumi

ban gaya kis qadar amir hun main

mere zahir ko dekhne wale

ek baatin ghani faqir hun main

aazma le tu jis tarah chahe

hun to kam-maya ba-zamir hun main

tu hai anwar-e-be-karan tu bata

kis ka ek para-e-munir hun main

ye sawal ab tere bachao ka hai

teri khinchi agar lakir hun main

koi harf-e-talab na harf-e-sawal

aisa ek boriya-pazir hun main

teri kirnon ne tarbiyat ki hai

mana ek zarra-e-haqir hun main

KHatm mujh par hai infirad mera

aap apni hi ek nazir hun main

ek tahzib ke sahife ka

shayad ab hissa-e-aKHir hun main

'tarzi' karta hun phir rafu daman

yani ek said-e-tark-o-gir hun mein