apne haalat ki taswir dikhaen kaise

apne hālāt kī tasvīr dikhā.eñ kaise

rūThne vaale batā tujh ko manā.eñ kaise

zinda lāshoñ ko uThā.e hue haiñ kāñdhoñ par

zindagī bojh tirā roz uThā.eñ kaise

jis ko ḳhud apnā patā hai na zamāne kī ḳhabar

aise insān ko sote se jagā.eñ kaise

sochte sochte ik umr-e-tamanna guzrī

tanz ke tiir se ham ḳhud ko bachā.eñ kaise

manzil-e-ġham hai shab-e-hijr kā sannāTā hai

apnī duniyā-e-tasavvur ko sajā.eñ kaise

ye tasanño ye banāvaT ye havas makr-o-fareb

bazm-e-ahbāb se ham 'josh' miTā.eñ kaise

apne haalat ki taswir dikhaen kaise

ruThne wale bata tujh ko manaen kaise

zinda lashon ko uThae hue hain kandhon par

zindagi bojh tera roz uThaen kaise

jis ko KHud apna pata hai na zamane ki KHabar

aise insan ko sote se jagaen kaise

sochte sochte ek umr-e-tamanna guzri

tanz ke tir se hum KHud ko bachaen kaise

manzil-e-gham hai shab-e-hijr ka sannaTa hai

apni duniya-e-tasawwur ko sajaen kaise

ye tasanno ye banawaT ye hawas makr-o-fareb

bazm-e-ahbab se hum 'josh' miTaen kaise