اپنے ہاتھوں میں اٹھائے ہوئے سر آ گئے ہیں

اپنے ہاتھوں میں اٹھائے ہوئے سر آ گئے ہیں

اے مرے تیغ بکف تشنہ جگر آ گئے ہیں

فصل جاں کاٹنے والوں کو خبر کر دینا

پھر بہار آ گئی پھر شانوں پہ سر آ گئے ہیں

تیشہ انداز رہے روشنیوں کے لشکر

خود بہ خود کب مری دیوار میں در آ گئے ہیں

پارۂ ابر بھی کیا دست ہنر رکھتا تھا

پیڑ سرسبز ہوئے برگ و ثمر آ گئے ہیں

خاک رہ اس کی اٹھائی ہے تو کیا دیکھتا ہوں

میری مٹھی میں کئی شمس و قمر آ گئے ہیں

آسماں اتنی رعونت نہیں اچھی ہوتی

کیا خبر تجھ کو نہیں ہے مرے پر آ گئے ہیں

سر پھری دھوپ سے میں نے جو نمٹنا چاہا

آفتابوں کی حمایت میں شجر آ گئے ہیں

چاہئے جن کے لیے آنکھ کے اندر اک آنکھ

ہم کو اکثر وہ مناظر بھی نظر آ گئے ہیں

رنگ بے کیف جو ہیں کوئے توجہ کے تو کیا

تیرے دیوانے ترے زیر اثر آ گئے ہیں

اس کی آواز پہ لبیک کی آواز عبث

درمیاں عہد گذشتہ کے کھنڈر آ گئے ہیں

آج دریا نے دکھائی ہے بڑی فیاضی

میرے ہاتھوں میں بھی دو چار گہر آ گئے ہیں

مل گئے حرف و نوا اس کے تبسم سے مجھے

شاخ اظہار پہ بھی برگ و ثمر آ گئے ہیں

اس کے بچ بچ کے گزرنے سے ہوا ہے ظاہر

میری آنکھوں میں اسے خواب نظر آ گئے ہیں

اب وہ جذبات میں گرمی نہ تمنا نہ امنگ

راستہ بھول کے ہم لوگ کدھر آ گئے ہیں

اے چراغو سنو اب دست دعا کر لو بلند

جن کی جانب تھا اشارہ وہ کھنڈر آ گئے ہیں

ہجرتیں اوڑھ کے نکلے تھے پرندے یاورؔ

شام آئی ہے تو پھر لوٹ کے گھر آ گئے ہیں