apne hathon mein uThae hue sar aa gae hain

apne hāthoñ meñ uThā.e hue sar aa ga.e haiñ

ai mire teġh-ba-kaf tishna-jigar aa ga.e haiñ

fasl-e-jāñ kāTne vāloñ ko ḳhabar kar denā

phir bahār aa ga.ī phir shānoñ pe sar aa ga.e haiñ

tesha-andāz rahe raushniyoñ ke lashkar

ḳhud-ba-ḳhud kab mirī dīvār meñ dar aa ga.e haiñ

pāra-e-abr bhī kyā dast-e-hunar rakhtā thā

peḌ sarsabz hue barg-o-samar aa ga.e haiñ

ḳhāk-e-rah us kī uThā.ī hai to kyā dekhtā huuñ

merī muTThī meñ ka.ī shams-o-qamar aa ga.e haiñ

āsmāñ itnī ra.ūnat nahīñ achchhī hotī

kyā ḳhabar tujh ko nahīñ hai mire par aa ga.e haiñ

sar-phirī dhuup se maiñ ne jo nimaTnā chāhā

āftāboñ kī himāyat meñ shajar aa ga.e haiñ

chāhiye jin ke liye aañkh ke andar ik aañkh

ham ko aksar vo manāzir bhī nazar aa ga.e haiñ

rang be-kaif jo haiñ kū-e-tavajjoh ke to kyā

tere dīvāne tire zer-e-asar aa ga.e haiñ

us kī āvāz pe labbaik kī āvāz abas

darmiyāñ ahd-e-guzashta ke khañDar aa ga.e haiñ

aaj dariyā ne dikhā.ī hai baḌī fayyāzī

mere hāthoñ meñ bhī do-chār guhar aa ga.e haiñ

mil ga.e harf-o-navā us ke tabassum se mujhe

shāḳh-e-iz.hār pe bhī barg-o-samar aa ga.e haiñ

us ke bach bach ke guzarne se huā hai zāhir

merī āñkhoñ meñ use ḳhvāb nazar aa ga.e haiñ

ab vo jazbāt meñ garmī na tamanna na umang

rāsta bhuul ke ham log kidhar aa ga.e haiñ

ai charāġho suno ab dast-e-duā kar lo buland

jin kī jānib thā ishāra vo khañDar aa ga.e haiñ

hijrateñ oḌh ke nikle the parinde 'yāvar'

shaam aa.ī hai to phir lauT ke ghar aa ga.e haiñ

apne hathon mein uThae hue sar aa gae hain

ai mere tegh-ba-kaf tishna-jigar aa gae hain

fasl-e-jaan kaTne walon ko KHabar kar dena

phir bahaar aa gai phir shanon pe sar aa gae hain

tesha-andaz rahe raushniyon ke lashkar

KHud-ba-KHud kab meri diwar mein dar aa gae hain

para-e-abr bhi kya dast-e-hunar rakhta tha

peD sarsabz hue barg-o-samar aa gae hain

KHak-e-rah us ki uThai hai to kya dekhta hun

meri muTThi mein kai shams-o-qamar aa gae hain

aasman itni raunat nahin achchhi hoti

kya KHabar tujh ko nahin hai mere par aa gae hain

sar-phiri dhup se main ne jo nimaTna chaha

aaftabon ki himayat mein shajar aa gae hain

chahiye jin ke liye aankh ke andar ek aankh

hum ko aksar wo manazir bhi nazar aa gae hain

rang be-kaif jo hain ku-e-tawajjoh ke to kya

tere diwane tere zer-e-asar aa gae hain

us ki aawaz pe labbaik ki aawaz abas

darmiyan ahd-e-guzashta ke khanDar aa gae hain

aaj dariya ne dikhai hai baDi fayyazi

mere hathon mein bhi do-chaar guhar aa gae hain

mil gae harf-o-nawa us ke tabassum se mujhe

shaKH-e-izhaar pe bhi barg-o-samar aa gae hain

us ke bach bach ke guzarne se hua hai zahir

meri aankhon mein use KHwab nazar aa gae hain

ab wo jazbaat mein garmi na tamanna na umang

rasta bhul ke hum log kidhar aa gae hain

ai charagho suno ab dast-e-dua kar lo buland

jin ki jaanib tha ishaara wo khanDar aa gae hain

hijraten oDh ke nikle the parinde 'yawar'

sham aai hai to phir lauT ke ghar aa gae hain