اپنے حلقے میں کبھی رکھے نہیں ہشیار لوگ

اپنے حلقے میں کبھی رکھے نہیں ہشیار لوگ

ہم دوانے ہیں دوانے ہیں ہمارے یار لوگ

تب کھلیں گے ان پہ تیری سادگی کے سارے رنگ

میری نظروں سے کریں گے جب ترا دیدار لوگ

جو محبت سے کبھی رہنے نہیں دیں گے ہمیں

اس طرف دو تین ہیں اور اس طرف دو چار لوگ

کچھ نہ کرنا ہو تو ان سے مشورہ کرنا ضرور

کام آئیں گے تمہارے بس یہی بے کار لوگ

اب بنانے لگ گئے ہیں یہ انا کو مسئلہ

اک ذرا سی ٹھیس پہونچی ہو گئے خود دار لوگ