apne hamrah mohabbat ke hawale rakhna

apne hamrāh mohabbat ke havāle rakhnā

kitnā dushvār hai ik rog ko paale rakhnā

itnā āsān nahīñ band galī meñ rahnā

shahr-e-tārīk meñ yādoñ ke ujāle rakhnā

ham ziyāda ke talabgār nahīñ haiñ lekin

vaqt kuchh bahr-e-mulāqāt nikāle rakhnā

baat kar leñge judā.ī pe kahīñ ba.ad meñ ham

apne hoñToñ pe sar-e-bazm to taale rakhnā

kaam ā.eñge kisī roz tumhāre ye guhar

apne ashkoñ ko mirī jaan sambhāle rakhnā

jhiil par jaise koī kaalī ghaTā chhā jaa.e

niilī āñkhoñ pe ghanī palkoñ ko Daale rakhnā

us ko ujḌe hue logoñ se hai ulfat 'shāhid'

baal bikhrā.e hue paañv meñ chhāle rakhnā

apne hamrah mohabbat ke hawale rakhna

kitna dushwar hai ek rog ko pale rakhna

itna aasan nahin band gali mein rahna

shahr-e-tarik mein yaadon ke ujale rakhna

hum ziyaada ke talabgar nahin hain lekin

waqt kuchh bahr-e-mulaqat nikale rakhna

baat kar lenge judai pe kahin baad mein hum

apne honTon pe sar-e-bazm to tale rakhna

kaam aaenge kisi roz tumhaare ye guhar

apne ashkon ko meri jaan sambhaale rakhna

jhil par jaise koi kali ghaTa chha jae

nili aankhon pe ghani palkon ko Dale rakhna

us ko ujDe hue logon se hai ulfat 'shahid'

baal bikhrae hue panw mein chhaale rakhna