apne hi dil ki baat se mahka gaya hun main

apne hī dil kī baat se mahkā gayā huuñ maiñ

apne hī rūh-o-jism meñ ghultā gayā huuñ maiñ

aisī hī kuchh kashish hai jo huuñ farsh-e-ḳhāk par

varna bulandiyoñ se bhī ūñchā gayā huuñ maiñ

ai 'ishq rāh-e-dost hai dushvār-tar bahut

yā'nī nigāh-e-nāz meñ aayā gayā huuñ maiñ

har chehra aa.ina hai nigāhoñ ke sāmne

har aa.ine ke qalb meñ dekhā gayā huuñ maiñ

maqsad har ik nigāh kā merī nazar meñ thā

kyā kyā fareb-e-dost haiñ batlā gayā huuñ maiñ

phir koī baat merī sabā le ke uḌ ga.ī

ḳhushbū kī tarh phūloñ se uḌtā gayā huuñ maiñ

yā to tire shabāb ko pahuñchī nahīñ nazar

yā vus'at-e-ḳhayāl se ghabrā gayā huuñ maiñ

har ibtidā.ī marhala pesh-e-nazar bhī thā

kyā hai ma.āl-e-'ishq ye samjhā gayā huuñ maiñ

ash'ār mere tere tasavvur kā jazb haiñ

jaise tire ḳhayāl se miltā gayā huuñ maiñ

apne hi dil ki baat se mahka gaya hun main

apne hi ruh-o-jism mein ghulta gaya hun main

aisi hi kuchh kashish hai jo hun farsh-e-KHak par

warna bulandiyon se bhi uncha gaya hun main

ai 'ishq rah-e-dost hai dushwar-tar bahut

ya'ni nigah-e-naz mein aaya gaya hun main

har chehra aaina hai nigahon ke samne

har aaine ke qalb mein dekha gaya hun main

maqsad har ek nigah ka meri nazar mein tha

kya kya fareb-e-dost hain batla gaya hun main

phir koi baat meri saba le ke uD gai

KHushbu ki tarh phulon se uDta gaya hun main

ya to tere shabab ko pahunchi nahin nazar

ya wus'at-e-KHayal se ghabra gaya hun main

har ibtidai marhala pesh-e-nazar bhi tha

kya hai maal-e-'ishq ye samjha gaya hun main

ash'ar mere tere tasawwur ka jazb hain

jaise tere KHayal se milta gaya hun main