اپنے ہی دل میں نہیں ہر دل میں گھر میں نے کیا

اپنے ہی دل میں نہیں ہر دل میں گھر میں نے کیا

اس طرح سے زندگی کا طے سفر میں نے کیا

خون دل سے عمر بھر میں نے سجائے بام و در

زندگی کا لمحہ لمحہ با ہنر میں نے کیا

اس نے بخشی عشق کے صحرا کی مجھ کو صاحبی

اور ہر ذرہ سے اس کو جلوہ گر میں نے کیا

ماہ و انجم فکر کی قیمت چکا سکتے نہیں

اپنے اک اک حرف کو رشک گہر میں نے کیا

ایک اک ٹہنی سے ملتی تھیں ہزاروں نعمتیں

پھر بھی ان پیڑوں کو بے برگ و ثمر میں نے کیا

مستؔ شاعر ہوں مگر واقف ہوں اپنے فرض سے

بے خبر رہ کر بھی سب کو با خبر میں نے کیا