apne hi ek KHwab se haare hue hain hum

apne hī ek ḳhvāb se haare hue haiñ ham

kaisī hasīn raat ke maare hue haiñ ham

vo ashk-bār aañkh hai lab chūmtī huī

pī kar udaas lams hī khāre hue haiñ ham

ik jang laḌ rahe haiñ bilā teġh be-sipar

dushman bhī soch meñ hai ki haare hue haiñ ham

ronā paḌegā haar ke āḳhir ḳhudā ko bhī

kab se duā ko haath pasāre hue haiñ ham

ik raushnī sī kauñdh ga.ī āsmān meñ

bujhtī huī do āñkhoñ ke taare hue haiñ ham

milnā hai terī ruuh se ham ko badan baġhair

apnā libās-e-jism utāre hue haiñ ham

apne hi ek KHwab se haare hue hain hum

kaisi hasin raat ke mare hue hain hum

wo ashk-bar aankh hai lab chumti hui

pi kar udas lams hi khaare hue hain hum

ek jang laD rahe hain bila tegh be-sipar

dushman bhi soch mein hai ki haare hue hain hum

rona paDega haar ke aaKHir KHuda ko bhi

kab se dua ko hath pasare hue hain hum

ek raushni si kaundh gai aasman mein

bujhti hui do aankhon ke tare hue hain hum

milna hai teri ruh se hum ko badan baghair

apna libas-e-jism utare hue hain hum