اپنے ہی ایک خواب سے ہارے ہوئے ہیں ہم

اپنے ہی ایک خواب سے ہارے ہوئے ہیں ہم

کیسی حسین رات کے مارے ہوئے ہیں ہم

وہ اشک بار آنکھ ہے لب چومتی ہوئی

پی کر اداس لمس ہی کھارے ہوئے ہیں ہم

اک جنگ لڑ رہے ہیں بلا تیغ بے سپر

دشمن بھی سوچ میں ہے کہ ہارے ہوئے ہیں ہم

رونا پڑے گا ہار کے آخر خدا کو بھی

کب سے دعا کو ہاتھ پسارے ہوئے ہیں ہم

اک روشنی سی کوندھ گئی آسمان میں

بجھتی ہوئی دو آنکھوں کے تارے ہوئے ہیں ہم

ملنا ہے تیری روح سے ہم کو بدن بغیر

اپنا لباس جسم اتارے ہوئے ہیں ہم