اپنے ہی کسی غم کا مداوا نہیں ہوتا

اپنے ہی کسی غم کا مداوا نہیں ہوتا

ورنہ تری دنیا میں تو کیا کیا نہیں ہوتا

اس شہر میں چہروں کی کمی کوئی نہیں ہے

لیکن کوئی چہرہ یہاں اپنا نہیں ہوتا

تم غم میں اسے دیکھ کے حیران سے کیوں ہو

اس شخص کا خوشیوں سے گزارا نہیں ہوتا

معلوم ذرا کر لو تم اس شخص کی چاہت

ہر رنگ سبھی کے لیے اچھا نہیں ہوتا

جب خواب تراشو گے تو یہ بات کھلے گی

ہر خواب ہر اک آنکھ کا سچا نہیں ہوتا

مدت سے ترے ساتھ ہوں میں ایک سفر میں

پھر بھی تری باتوں پہ بھروسہ نہیں ہوتا