apne hi sajde ka hai shauq mere sar-e-niyaz mein

apne hī sajde kā hai shauq mere sar-e-niyāz meñ

ka.aba-e-dil hai sāmne mahv huuñ maiñ namāz meñ

biinā hai gar to ḳhaak Daal dīda-e-imtiyāz meñ

jaam o ḳhum-o-subū na dekh mai-kada-e-majāz meñ

kis kā faroġh-e-aks hai kaun hai mahv-e-nāz meñ

kauñd rahī haiñ bijliyāñ ā.īna-e-majāz meñ

sub.h-e-azal hai sub.h-e-husn shām-e-abad hai dāġh-e-ishq

dil hai maqām-e-irtibāt silsila-e-darāz meñ

parda-e-e'tibār-e-ġhair pairahan-e-ḳhudī hai chaak

husn-e-azal hai jalva-rez sadma-e-dil-gudāz meñ

aql-o-shu.ūr bhī haiñ kyā uqda-e-rāz-e-dahr haiñ

rah ga.e aur ulajh ke ham sa.ī-e-kashūd-e-rāz meñ

yaad kisī kī aa ga.ī kaT ga.ī zindagī kī raat

varna kahāñ numūd-e-sub.h aisī shab-e-darāz meñ

dafn hai dil jagah jagah ka.aba hai gaam gaam par

sajda kahāñ kahāñ kare koī harīm-e-nāz meñ

husn ke āstāne par nāsiya rakh ke bhuul jā

fikr-e-qubūl-o-rad na kar pesh-kash-e-niyāz meñ

ḳhuun ke āñsuoñ se hai zīnat-e-husn-e-dil 'jigar'

chāhiye dāġh-e-ishq bhī sīna-e-pāk-bāz meñ

apne hi sajde ka hai shauq mere sar-e-niyaz mein

kaba-e-dil hai samne mahw hun main namaz mein

bina hai gar to KHak Dal dida-e-imtiyaz mein

jam o KHum-o-subu na dekh mai-kada-e-majaz mein

kis ka farogh-e-aks hai kaun hai mahw-e-naz mein

kaund rahi hain bijliyan aaina-e-majaz mein

subh-e-azal hai subh-e-husn sham-e-abad hai dagh-e-ishq

dil hai maqam-e-irtibaat silsila-e-daraaz mein

parda-e-e'tibar-e-ghair pairahan-e-KHudi hai chaak

husn-e-azal hai jalwa-rez sadma-e-dil-gudaz mein

aql-o-shuur bhi hain kya uqda-e-raaz-e-dahr hain

rah gae aur ulajh ke hum sai-e-kashud-e-raaz mein

yaad kisi ki aa gai kaT gai zindagi ki raat

warna kahan numud-e-subh aisi shab-e-daraaz mein

dafn hai dil jagah jagah kaba hai gam gam par

sajda kahan kahan kare koi harim-e-naz mein

husn ke aastane par nasiya rakh ke bhul ja

fikr-e-qubul-o-rad na kar pesh-kash-e-niyaz mein

KHun ke aansuon se hai zinat-e-husn-e-dil 'jigar'

chahiye dagh-e-ishq bhi sina-e-pak-baz mein