apne hi tale aai zaminon se nikal kar

apne hī tale aa.ī zamīnoñ se nikal kar

aa jaatā huuñ shāḳhoñ pe dafīnoñ se nikal kar

darvāze the kuchh aur bhī darvāze ke pīchhe

barsoñ pe ga.ī baat mahīnoñ se nikal kar

so jaatī hai bastī to makāñ pichhlī galī meñ

tanhā khaḌā rahtā hai makīnoñ se nikal kar

kis sub.h-e-tamāshā kā bachāyā huā sajda

ruḳh par chalā aatā hai jabīnoñ se nikal kar

aisī koī āsān hai dīvāngī yaaro

aa.ī bhī to aa.egī qarīnoñ se nikal kar

vo aur koī abr hai jo khultā nahīñ hai

sar par jo khaḌā rahtā hai sīnoñ se nikal kar

muddat se mire rāste meñ aayā huā hai

patthar sā koī tere nagīnoñ se nikal kar

ik roz jo dīvār thī vo ham ne girā dī

paanī meñ chale aa.e safīnoñ se nikal kar

ye dekh mirā naḳhl-e-kutub-hā-e-daraḳhshāñ

jo phail gayā ḳhuun pasīnoñ se nikal kar

aa jaate haiñ sāhil pe dikhāne hameñ muñh log

tārīkī meñ Duube hue zīnoñ se nikal kar

ik den hai ham jaisoñ kī āshufta-sarī ko

tham rahtā hai āfāq pe dīnoñ se nikal kar

zerīñ kahīñ rahtī hai tapasyā se bharī lahr

budh aur hai andoh-nashīnoñ se nikal kar

mismār ajā.ib jo huā jañg-o-jadal se

miTTī ke zarūf aa ga.e mīnoñ se nikal kar

hamrāh asāsoñ kī kahāñ DhūñD sakeñge

aayā na agar saañp ḳhazīnoñ se nikal kar

atrāf-e-dar-o-bām hī le baiTheñge mujh ko

gar qasd-e-chahārum na ho tīnoñ se nikal kar

phir sāmnā hogā mirā apnī hī mashīñ se

aayā bhī jo bil-farz mashīnoñ se nikal kar

duniyā ko piro.egā 'naved' ek laḌī meñ

aa.egā koī ḳhāk-nashīnoñ se nikal kar

apne hi tale aai zaminon se nikal kar

aa jata hun shaKHon pe dafinon se nikal kar

darwaze the kuchh aur bhi darwaze ke pichhe

barson pe gai baat mahinon se nikal kar

so jati hai basti to makan pichhli gali mein

tanha khaDa rahta hai makinon se nikal kar

kis subh-e-tamasha ka bachaya hua sajda

ruKH par chala aata hai jabinon se nikal kar

aisi koi aasan hai diwangi yaro

aai bhi to aaegi qarinon se nikal kar

wo aur koi abr hai jo khulta nahin hai

sar par jo khaDa rahta hai sinon se nikal kar

muddat se mere raste mein aaya hua hai

patthar sa koi tere naginon se nikal kar

ek roz jo diwar thi wo hum ne gira di

pani mein chale aae safinon se nikal kar

ye dekh mera naKHl-e-kutub-ha-e-daraKHshan

jo phail gaya KHun pasinon se nikal kar

aa jate hain sahil pe dikhane hamein munh log

tariki mein Dube hue zinon se nikal kar

ek den hai hum jaison ki aashufta-sari ko

tham rahta hai aafaq pe dinon se nikal kar

zerin kahin rahti hai tapasya se bhari lahr

budh aur hai andoh-nashinon se nikal kar

mismar ajaib jo hua jang-o-jadal se

miTTi ke zaruf aa gae minon se nikal kar

hamrah asason ki kahan DhunD sakenge

aaya na agar sanp KHazinon se nikal kar

atraf-e-dar-o-baam hi le baiThenge mujh ko

gar qasd-e-chahaarum na ho tinon se nikal kar

phir samna hoga mera apni hi mashin se

aaya bhi jo bil-farz mashinon se nikal kar

duniya ko piroega 'nawed' ek laDi mein

aaega koi KHak-nashinon se nikal kar