apne hone ki ihanat nahin hum kar sakte

apne hone kī ihānat nahīñ ham kar sakte

so tirī yaad se ġhaflat nahīñ ham kar sakte

dil meñ laate nahīñ dushman se bhī nafrat kā ḳhayāl

is se kam koī ibādat nahīñ ham kar sakte

duur rahte haiñ takabbur kī havā se lekin

ijz ko ġhāfil-e-ġhairat nahīñ ham kar sakte

maslahat sahar bahut phūñktī phirtī hai bhare

kam qad-o-qāmat-e-vahshat nahīñ ham kar sakte

Dher tafrīh-e-tan-o-jāñ ke lagā do jitne

tark ik dard kī daulat nahīñ ham kar sakte

chhoḌ sakte haiñ ye sab sehn-o-dar-o-bām-e-jahāñ

qariya-e-ḳhvāb se hijrat nahīñ ham kar sakte

tum zamīñ par jo ḳhudā bante chale jaate ho

kyā samajhte ho baġhāvat nahīñ ham kar sakte

jis ravish bhī ho ravāñ ġhol-e-zamānā 'ālī'

aap se koī ri.āyat nahīñ ham kar sakte

apne hone ki ihanat nahin hum kar sakte

so teri yaad se ghaflat nahin hum kar sakte

dil mein late nahin dushman se bhi nafrat ka KHayal

is se kam koi ibaadat nahin hum kar sakte

dur rahte hain takabbur ki hawa se lekin

ijz ko ghafil-e-ghairat nahin hum kar sakte

maslahat sahar bahut phunkti phirti hai bhare

kam qad-o-qamat-e-wahshat nahin hum kar sakte

Dher tafrih-e-tan-o-jaan ke laga do jitne

tark ek dard ki daulat nahin hum kar sakte

chhoD sakte hain ye sab sehn-o-dar-o-baam-e-jahan

qariya-e-KHwab se hijrat nahin hum kar sakte

tum zamin par jo KHuda bante chale jate ho

kya samajhte ho baghawat nahin hum kar sakte

jis rawish bhi ho rawan ghol-e-zamana 'ali'

aap se koi riayat nahin hum kar sakte