apne honTon pe na shikwe na gile hain sahab

apne hoñToñ pe na shikve na gile haiñ sāhab

rah ga.e ġham so muqaddar se mile haiñ sāhab

pas-e-zindāñ sar-e-maqtal bhī sar-e-dār bhī ham

kyā yahī apnī vafāoñ ke sile haiñ sāhab

mai-kashī ko na sahī va.az ko aa.e hoñge

mai-kade meñ bhī hameñ shaiḳh mile haiñ sāhab

ek arsa huā yuuñ tark-e-ta.alluq ko magar

un kī yādoñ ke kañval ab bhī khile haiñ sāhab

tab bhī bardāsht kiyā ab bhī sitam kar dekheñ

hoñT apne the sile ab bhī sile haiñ sāhab

ye mirī izzat-o-shohrat ye taraqqī ye uruuj

ye mirī maañ kī duāoñ ke sile haiñ sāhab

'rāshid'-e-ḳhasta se lagtī hai shanāsā.ī bahut

aap kyā pahle kabhī us se mile haiñ sāhab

apne honTon pe na shikwe na gile hain sahab

rah gae gham so muqaddar se mile hain sahab

pas-e-zindan sar-e-maqtal bhi sar-e-dar bhi hum

kya yahi apni wafaon ke sile hain sahab

mai-kashi ko na sahi waz ko aae honge

mai-kade mein bhi hamein shaiKH mile hain sahab

ek arsa hua yun tark-e-talluq ko magar

un ki yaadon ke kanwal ab bhi khile hain sahab

tab bhi bardasht kiya ab bhi sitam kar dekhen

honT apne the sile ab bhi sile hain sahab

ye meri izzat-o-shohrat ye taraqqi ye uruj

ye meri man ki duaon ke sile hain sahab

'rashid'-e-KHasta se lagti hai shanasai bahut

aap kya pahle kabhi us se mile hain sahab