apne inkar ke bar-aks barabar koi tha

apne inkār ke bar-aks barābar koī thā

dil meñ ik ḳhvāb thā aur ḳhvāb ke andar koī thā

ham pasīne meñ sharābor the aur duur kahīñ

aise lagtā hai kahīñ taḳht-e-havā par koī thā

us ke bāġhāt pe utrā huā thā mausam-e-rañg

qābil-e-dīd har ik samt se manzar koī thā

shak agar thā bhī to miTtā gayā hote hote

aur ab puḳhta yaqīñ hai ki sarāsar koī thā

is dil-e-tañg meñ kyā us kī rihā.ish hotī

yaanī andar to nahīñ thā mire bāhar koī thā

shakl kuchh yaad hai kuchh bhuul chukī hai us kī

koī din the ki mukammal mujhe azbar koī thā

dā.ere meñ kabhī rakkhā hī nahīñ us ne qadam

aur mohabbat ke mazāfāt meñ aksar koī thā

maiñ use chhoḌ ke ḳhud hī chalā aayā thā kabhī

aur ab pūchhtā phirtā huuñ mirā ghar koī thā

yāva-go thā 'zafar' is ahd-e-ḳharābī meñ koī

yāva-go hī use kahte haiñ suḳhan-var koī thā

apne inkar ke bar-aks barabar koi tha

dil mein ek KHwab tha aur KHwab ke andar koi tha

hum pasine mein sharabor the aur dur kahin

aise lagta hai kahin taKHt-e-hawa par koi tha

us ke baghat pe utra hua tha mausam-e-rang

qabil-e-did har ek samt se manzar koi tha

shak agar tha bhi to miTta gaya hote hote

aur ab puKHta yaqin hai ki sarasar koi tha

is dil-e-tang mein kya us ki rihaish hoti

yani andar to nahin tha mere bahar koi tha

shakl kuchh yaad hai kuchh bhul chuki hai us ki

koi din the ki mukammal mujhe azbar koi tha

daere mein kabhi rakkha hi nahin us ne qadam

aur mohabbat ke mazafat mein aksar koi tha

main use chhoD ke KHud hi chala aaya tha kabhi

aur ab puchhta phirta hun mera ghar koi tha

yawa-go tha 'zafar' is ahd-e-KHarabi mein koi

yawa-go hi use kahte hain suKHan-war koi tha