اپنے جذبات کو لفظوں میں دباؤں کب تک

اپنے جذبات کو لفظوں میں دباؤں کب تک

میں حقیقت کو مرے خواب دکھاؤں کب تک

پھر چراغوں کو ہواؤں سے بچانے کے لیے

اپنے ہاتھوں ہی کو فانوس بناؤں کب تک

دل مضطر یہ بتا جھوٹی تسلی کے لیے

میں تصور میں بھلا اس کو بلاؤں کب تک

جس کے انصاف سے قاتل کو سکوں حاصل ہو

ایسے منصف کو ہرے زخم دکھاؤں کب تک

وہ جو آ جائیں تو پھر ضد نہ کریں جانے کی

بات یہ ان کو بتاؤں تو بتاؤں کب تک

دست افلاس کی دستک کو مسلسل سن کر

اپنے ہاتھوں میں نوالوں کو اٹھاؤں کب تک

اس کی آمد کی خبر سن کے میں عرفاںؔ آخر

اپنی پلکوں کو سر راہ بچھاؤں کب تک