apne jazbaat ko lafzon mein dabaun kab tak

apne jazbāt ko lafzoñ meñ dabā.ūñ kab tak

maiñ haqīqat ko mire ḳhvāb dikhā.ūñ kab tak

phir charāġhoñ ko havāoñ se bachāne ke liye

apne hāthoñ hī ko fānūs banā.ūñ kab tak

dil-e-muztar ye batā jhūTī tasallī ke liye

maiñ tasavvur meñ bhalā us ko bulā.ūñ kab tak

jis ke insāf se qātil ko sukūñ hāsil ho

aise munsif ko hare zaḳhm dikhā.ūñ kab tak

vo jo aa jaa.eñ to phir zid na kareñ jaane kī

baat ye un ko batā.ūñ to batā.ūñ kab tak

dast-e-iflās kī dastak ko musalsal sun kar

apne hāthoñ meñ nivāloñ ko uThā.ūñ kab tak

us kī aamad kī ḳhabar sun ke maiñ 'irfāñ' āḳhir

apnī palkoñ ko sar-e-rāh bichhā.ūñ kab tak

apne jazbaat ko lafzon mein dabaun kab tak

main haqiqat ko mere KHwab dikhaun kab tak

phir charaghon ko hawaon se bachane ke liye

apne hathon hi ko fanus banaun kab tak

dil-e-muztar ye bata jhuTi tasalli ke liye

main tasawwur mein bhala us ko bulaun kab tak

jis ke insaf se qatil ko sukun hasil ho

aise munsif ko hare zaKHm dikhaun kab tak

wo jo aa jaen to phir zid na karen jaane ki

baat ye un ko bataun to bataun kab tak

dast-e-iflas ki dastak ko musalsal sun kar

apne hathon mein niwalon ko uThaun kab tak

us ki aamad ki KHabar sun ke main 'irfan' aaKHir

apni palkon ko sar-e-rah bichhaun kab tak