apne jazbe nisar mat karte

apne jazbe nisār mat karte

vaqt kā e'tibār mat karte

daaġh zaḳhmoñ ke an-ginat hoñge

ābloñ kā shumār mat karte

darmiyāñ fāsloñ ke sahrā haiñ

ab mirā intizār mat karte

ajnabī des uḌ ga.e panchhī

apne bachchoñ se pyaar mat karte

nafratoñ ke qimār-ḳhāne meñ

pyaar kā kārobār mat karte

pair to pattharoñ ke aadī haiñ

tai koī sabza-zār mat karte

ik mire jurm-e-be-gunāhī kā

tazkira baar baar mat karte

zulm tārīk isti.āra hai

sāhab-e-eqtidār mat karte

'nūr' is kūcha-e-malāmat meñ

ehtirām-e-bahār mat karte

apne jazbe nisar mat karte

waqt ka e'tibar mat karte

dagh zaKHmon ke an-ginat honge

aablon ka shumar mat karte

darmiyan faslon ke sahra hain

ab mera intizar mat karte

ajnabi des uD gae panchhi

apne bachchon se pyar mat karte

nafraton ke qimar-KHane mein

pyar ka karobar mat karte

pair to pattharon ke aadi hain

tai koi sabza-zar mat karte

ek mere jurm-e-be-gunahi ka

tazkira bar bar mat karte

zulm tarik istiara hai

sahab-e-eqtidar mat karte

'nur' is kucha-e-malamat mein

ehtiram-e-bahaar mat karte