apne jine ko kya puchho subh bhi goya raat rahi

apne jiine ko kyā pūchho sub.h bhī goyā raat rahī

tum bhī rūThe jag bhī rūThā ye bhī vaqt kī baat rahī

pyaar ke khel meñ dil ke mālik ham to sab kuchh kho baiThe

aksar tum se shart lagī hai aksar apnī maat rahī

laakh diye duniyā ne charke laakh lage dil par pahre

husn ne lākhoñ chāleñ badlīñ lekin ishq kī ghaat rahī

tum kyā samjhe tum se chhuT kar haath bhalā ham kyuuñ malte

chashm-o-dil ke shaġhl ko aksar ashkoñ kī barsāt rahī

tum se do do baat kī ḳhātir ham aage baḌh aa.e the

pīchhe pīchhe saath hamāre talḳhī-e-lamhāt rahī

ThanDī ThanDī aah kī ḳhushbū narm o garm ashkoñ ke haar

sach pūchho to apnī saarī ziist kī ye sauġhāt rahī

kaise sub.h ko shaam karūñgā kaise kaTeñge umr ke din

soch rahā huuñ ab jo yahī be-chārgī-e-hālāt rahī

apne jine ko kya puchho subh bhi goya raat rahi

tum bhi ruThe jag bhi ruTha ye bhi waqt ki baat rahi

pyar ke khel mein dil ke malik hum to sab kuchh kho baiThe

aksar tum se shart lagi hai aksar apni mat rahi

lakh diye duniya ne charke lakh lage dil par pahre

husn ne lakhon chaalen badlin lekin ishq ki ghat rahi

tum kya samjhe tum se chhuT kar hath bhala hum kyun malte

chashm-o-dil ke shaghl ko aksar ashkon ki barsat rahi

tum se do do baat ki KHatir hum aage baDh aae the

pichhe pichhe sath hamare talKHi-e-lamhat rahi

ThanDi ThanDi aah ki KHushbu narm o garm ashkon ke haar

sach puchho to apni sari zist ki ye saughat rahi

kaise subh ko sham karunga kaise kaTenge umr ke din

soch raha hun ab jo yahi be-chaargi-e-haalat rahi