apne ka hai gunah begane ne kya kiya

apne kā hai gunāh begāne ne kyā kiyā

is dil ko kyā kahūñ ki divāne ne kyā kiyā

yaañ tak satānā muj ko ki ro ro kahe tū haa.e

yaaro na tum sunā ki fulāne ne kyā kiyā

parda to rāz-e-ishq se ai yaar uTh chukā

be-sūd ham se muñh ke chhupāne ne kyā kiyā

āñkhoñ kī rahbarī ne kahūñ kyā ki dil ke saath

kūche kī us ke raah batāne ne kyā kiyā

kaam aa.ī kohkan kī mashaqqat na ishq meñ

patthar se jū-e-shīr ke laane ne kyā kiyā

Tuk dar tak apne aa mire nāseh kā haal dekh

maiñ to divānā thā pe siyāne ne kyā kiyā

chāhūñ maiñ kis tarah ye zamāne kī dostī

auroñ se dost ho ke zamāne ne kyā kiyā

kahtā thā maiñ gale kā tire ho paḌūñgā haar

dekhā na gul ko sar pe chaḌhāne ne kyā kiyā

'saudā' hai be-tarah kā nasha jām-e-ishq meñ

dekhā ki us ko muñh ke lagāne ne kyā kiyā

apne ka hai gunah begane ne kya kiya

is dil ko kya kahun ki diwane ne kya kiya

yan tak satana muj ko ki ro ro kahe tu hae

yaro na tum suna ki fulane ne kya kiya

parda to raaz-e-ishq se ai yar uTh chuka

be-sud hum se munh ke chhupane ne kya kiya

aankhon ki rahbari ne kahun kya ki dil ke sath

kuche ki us ke rah batane ne kya kiya

kaam aai kohkan ki mashaqqat na ishq mein

patthar se ju-e-shir ke lane ne kya kiya

Tuk dar tak apne aa mere naseh ka haal dekh

main to diwana tha pe siyane ne kya kiya

chahun main kis tarah ye zamane ki dosti

auron se dost ho ke zamane ne kya kiya

kahta tha main gale ka tere ho paDunga haar

dekha na gul ko sar pe chaDhane ne kya kiya

'sauda' hai be-tarah ka nasha jam-e-ishq mein

dekha ki us ko munh ke lagane ne kya kiya