اپنے کچھ خواب بچانے کے لئے نکلا تھا

اپنے کچھ خواب بچانے کے لئے نکلا تھا

میں بھی اس گھر سے کمانے کے لئے نکلا تھا

آج دیکھوں تو وہی چاروں طرف ہے میرے

میں کہ جس غم کو بھلانے کے لئے نکلا تھا

اس سے وابستہ پرندوں کی سکونت بھی تھی

جس شجر کو میں گرانے کے لئے نکلا تھا

میرے اپنے بھی مسائل تھے یقیناً اس میں

لوگ سمجھے کہ زمانے کے لئے نکلا تھا

زندگی کب تجھے سینے سے لگایا میں نے

میں تو دستار بچانے کے لئے نکلا تھا

راکھ دیکھی ہے تو پہچان ہوئی ہے اس کی

گھر سے جو آگ بجھانے کے لئے نکلا تھا

آج خود شہر خموشاں میں ہے سویا عاصمؔ

جو بھی اوروں کو جگانے کے لئے نکلا تھا