apne kumbe ki ye haalat nahin dekhi jati

apne kumbe kī ye hālat nahīñ dekhī jaatī

ham se har roz key hijrat nahīñ dekhī jaatī

dil ne is taur se furqat ke maze luuTe haiñ

terī āñkhoñ meñ mohabbat nahīñ dekhī jaatī

tū bhī so le ki zarā tujh ko sukūñ ho jaa.e

shab-e-furqat terī vahshat nahīñ dekhī jaatī

pyaas vo sab kī bujhā kar bhī tahī-dast rahā

ham se dariyā key ye ġhurbat nahīñ dekhī jaatī

haath uThāte hī ḳhudā se tujhe māñgā jaa.e

ishq meñ aisī tijārat nahīñ dekhī jaatī

tujh sā banñe kī tamanna meñ ye sargardāñ hai

chāñd terī ye mashaqqat nahīñ dekhī jaatī

apne ajdād kī qabroñ se judā ho ki nadīm

jo kamā.ī hai vo daulat nahīñ dekhī jaatī

apne kumbe ki ye haalat nahin dekhi jati

hum se har roz key hijrat nahin dekhi jati

dil ne is taur se furqat ke maze luTe hain

teri aankhon mein mohabbat nahin dekhi jati

tu bhi so le ki zara tujh ko sukun ho jae

shab-e-furqat teri wahshat nahin dekhi jati

pyas wo sab ki bujha kar bhi tahi-dast raha

hum se dariya key ye ghurbat nahin dekhi jati

hath uThate hi KHuda se tujhe manga jae

ishq mein aisi tijarat nahin dekhi jati

tujh sa banne ki tamanna mein ye sargardan hai

chand teri ye mashaqqat nahin dekhi jati

apne ajdad ki qabron se juda ho ki nadim

jo kamai hai wo daulat nahin dekhi jati