apne masum gunahon ki saza kya mangen

apne mā'sūm gunāhoñ kī sazā kyā māñgeñ

dosto tum se vafāoñ kā sila kyā māñgeñ

haath duniyā tire aage na kabhī phailegā

dene vaalā hai ḳhudā tujh se bhalā kyā māñgeñ

jaan de kar bhī na mil paa.ī kahīñ bū-e-vafā

hai hameñ ḳhud se gila tujh se vafā kyā māñgeñ

koī sūraj hī nayā nikle to din niklegā

bujh rahe haiñ jo diye un se ziyā kyā māñgeñ

us pe to saare hī darvāze hue band 'bashar'

haath uThā.e to haiñ soche haiñ du'ā kyā māñgeñ

apne ma'sum gunahon ki saza kya mangen

dosto tum se wafaon ka sila kya mangen

hath duniya tere aage na kabhi phailega

dene wala hai KHuda tujh se bhala kya mangen

jaan de kar bhi na mil pai kahin bu-e-wafa

hai hamein KHud se gila tujh se wafa kya mangen

koi suraj hi naya nikle to din niklega

bujh rahe hain jo diye un se ziya kya mangen

us pe to sare hi darwaze hue band 'bashar'

hath uThae to hain soche hain du'a kya mangen