apne mahaul se kuchh yun bhi to ghabrae na the

apne māhaul se kuchh yuuñ bhī to ghabrā.e na the

sañg lipTe hue phūloñ meñ nazar aa.e na the

dard zanjīr kī sūrat hai diloñ meñ maujūd

is se pahle to kabhī us ke ye pairā.e na the

chand bikhre hue rezoñ ke sivā kuchh bhī nahīñ

sochte haiñ ki chaTānoñ se bhī Takrā.e na the

tū ne ḳhud roz-e-azal ham se panāheñ māñgīñ

zindagī ham tujhe dāman meñ chhapā laa.e na the

ham ki har daur kī taz.īñ meñ rahe haiñ shāmil

ab bhī pachhtā.e nahīñ pahle bhī pachhtā.e na the

apne mahaul se kuchh yun bhi to ghabrae na the

sang lipTe hue phulon mein nazar aae na the

dard zanjir ki surat hai dilon mein maujud

is se pahle to kabhi us ke ye pairae na the

chand bikhre hue rezon ke siwa kuchh bhi nahin

sochte hain ki chaTanon se bhi Takrae na the

tu ne KHud roz-e-azal hum se panahen mangin

zindagi hum tujhe daman mein chhapa lae na the

hum ki har daur ki tazin mein rahe hain shamil

ab bhi pachhtae nahin pahle bhi pachhtae na the