apne mazi ki tarah ab bhi daraKHshanda hun

apne maazī kī tarah ab bhī daraḳhshanda huuñ

nāzish-e-hāl huuñ sūrat-gar-e-ā.inda huuñ

maar hī Daalā thā afkār-e-jahāñ ne mujh ko

ye mirī zinda-dilī hai ki abhī zinda huuñ

tū pashemāñ hai udhar apnī sitam-koshī par

maiñ idhar shikva-e-bedād pe sharminda huuñ

saare aalam meñ hai mīnāra-e-nūr apnā vajūd

maiñ añdheroñ meñ ujāloñ kā numā.inda huuñ

nazr-e-ālām sahī ḳhāk-bar-andām sahī

maiñ sitāroñ kī tarah phir bhī daraḳhshanda huuñ

māya-e-nāz hai mujh ko ye tavānā.ī-e-fikr

hai yahī baat ki maiñ zinda-o-pā.inda huuñ

yahī nisbat hai bahut mere ta.āruf ke liye

maiñ tirā chāhne vaalā tirā joinda huuñ

apne hī shahr meñ kholī thī 'fazā' ne āñkheñ

faḳhr hai mujh ko usī shahr kā bāshinda huuñ

umr saarī mirī ḳhatrāt meñ guzrī hai 'ġhanī'

aaj bhī maiñ unhīñ hālāt meñ huuñ zinda huuñ

apne mazi ki tarah ab bhi daraKHshanda hun

nazish-e-haal hun surat-gar-e-ainda hun

mar hi Dala tha afkar-e-jahan ne mujh ko

ye meri zinda-dili hai ki abhi zinda hun

tu pasheman hai udhar apni sitam-koshi par

main idhar shikwa-e-bedad pe sharminda hun

sare aalam mein hai minara-e-nur apna wajud

main andheron mein ujalon ka numainda hun

nazr-e-alam sahi KHak-bar-andam sahi

main sitaron ki tarah phir bhi daraKHshanda hun

maya-e-naz hai mujh ko ye tawanai-e-fikr

hai yahi baat ki main zinda-o-painda hun

yahi nisbat hai bahut mere taaruf ke liye

main tera chahne wala tera joinda hun

apne hi shahr mein kholi thi 'faza' ne aankhen

faKHr hai mujh ko usi shahr ka bashinda hun

umr sari meri KHatraat mein guzri hai 'ghani'

aaj bhi main unhin haalat mein hun zinda hun