apne mahbub ka inam nazar mein rakhna

apne mahbūb kā in'ām nazar meñ rakhnā

vā'da-e-vasl kī vo shaam nazar meñ rakhnā

tū mujhe pyaar se āvāz lagāne ke liye

ḳhūbsūrat sā koī naam nazar meñ rakhnā

roz 'aa.ed nayā qānūn jo kar dete ho

is na.e kaam kā anjām nazar meñ rakhnā

apne vā'de ko are jān-e-jahāñ bhuul ga.e

merā vā'da mirā paiġhām nazar meñ rakhnā

shab-e-vā'da na agar aane kī fursat ho tumheñ

mere sar rakhne ko ilzām nazar meñ rakhnā

bāda-kash terā na rah jaa.e kahīñ tishna-dahan

us ke hisse kā bhī ik jaam nazar meñ rakhnā

chhoḌ kar chal diye is shahr ko 'faisal' phir bhī

ye galī kūcha dar-o-bām nazar meñ rakhnā

apne mahbub ka in'am nazar mein rakhna

wa'da-e-wasl ki wo sham nazar mein rakhna

tu mujhe pyar se aawaz lagane ke liye

KHubsurat sa koi nam nazar mein rakhna

roz 'aed naya qanun jo kar dete ho

is nae kaam ka anjam nazar mein rakhna

apne wa'de ko are jaan-e-jahan bhul gae

mera wa'da mera paigham nazar mein rakhna

shab-e-wa'da na agar aane ki fursat ho tumhein

mere sar rakhne ko ilzam nazar mein rakhna

baada-kash tera na rah jae kahin tishna-dahan

us ke hisse ka bhi ek jam nazar mein rakhna

chhoD kar chal diye is shahr ko 'faisal' phir bhi

ye gali kucha dar-o-baam nazar mein rakhna