اپنے مقصد میں یہ ناکام ہوئی جاتی ہے

اپنے مقصد میں یہ ناکام ہوئی جاتی ہے

زندگی موت کا پیغام ہوئی جاتی ہے

بے کراں تلخیٔ آلام ہوئی جاتی ہے

جاوداں گردش ایام ہوئی جاتی ہے

ابتدا صورت انجام ہوئی جاتی ہے

ہر سحر میرے لئے شام ہوئی جاتی ہے

چیز جو خاص تھی وہ عام ہوئی جاتی ہے

عاشقی مفت میں بدنام ہوئی جاتی ہے

عشق میں نالہ و فریاد و فغاں کیا معنی

آہ بھی مورد الزام ہوئی جاتی ہے

کیا کوئی اور نہیں یاد خدا کی صورت

بندگی مشغلۂ عام ہوئی جاتی ہے

بے خودی کے لئے سامان بہم ہیں لاکھوں

کیوں یہ پابند مئے و جام ہوئی جاتی ہے

شوق بے حد کی قسم ذوق فراواں کی قسم

ابھی پختہ روش خام ہوئی جاتی ہے

دیکھ کر حضرت انساں کی یہ خون آشامی

موت بھی لرزہ بر اندام ہوئی جاتی ہے

اہل دانش جسے کرتے ہیں یقیں سے تعبیر

وہ بھی من جملۂ اوہام ہوئی جاتی ہے

جذبۂ شوق کو اللہ سلامت رکھے

کامراں حسرت ناکام ہوئی جاتی ہے

مقصد عشق کی تعمیر میں کیا حاجت غیر

خود نظر صرف در و بام ہوئی جاتی ہے

کعبۂ دل میں ہے اب شغل صنم سازیٔ حسن

آذری شیوۂ اسلام ہوئی جاتی ہے

عزم رہرو کی گرانی کا اثر ہے کیا خوب

سخت منزل بھی تہہ گام ہوئی جاتی ہے

وجد کرتی ہے غزل پر مری روح حافظؔ

یہ بھی فرمودۂ خیامؔ ہوئی جاتی ہے

اللہ اللہ یہ انداز تکلم طالبؔ

شاعری آپ کی الہام ہوئی جاتی ہے