apne maqsad mein ye nakaam hui jati hai

apne maqsad meñ ye nākām huī jaatī hai

zindagī maut kā paiġhām huī jaatī hai

be-karāñ talḳhī-e-ālām huī jaatī hai

jāvedāñ gardish-e-ayyām huī jaatī hai

ibtidā sūrat-e-anjām huī jaatī hai

har sahar mere liye shaam huī jaatī hai

chiiz jo ḳhaas thī vo aam huī jaatī hai

āshiqī muft meñ badnām huī jaatī hai

ishq meñ nāla-o-faryād-o-fuġhāñ kyā ma.anī

aah bhī morid-e-ilzām huī jaatī hai

kyā koī aur nahīñ yād-e-ḳhudā kī sūrat

bandagī mashġhalā-e-ām huī jaatī hai

be-ḳhudī ke liye sāmān baham haiñ lākhoñ

kyuuñ ye pāband-e-mai-o-jām huī jaatī hai

shauq-e-behad kī qasam zauq-e-farāvāñ kī qasam

abhī puḳhta ravish-e-ḳhām huī jaatī hai

dekh kar hazrat-e-insāñ kī ye ḳhūn-āshāmī

maut bhī larza-bar-andām huī jaatī hai

ahl-e-dānish jise karte haiñ yaqīñ se ta.abīr

vo bhī min-jumla-e-auhām hoī jaatī hai

jazba-e-shauq ko allāh salāmat rakkhe

kāmrāñ hasrat-e-nākām huī jaatī hai

maqsad-e-ishq kī ta.amīr meñ kyā hājat-e-ġhair

ḳhud nazar sarf-e-dar-o-bām huī jaatī hai

ka.aba-e-dil meñ hai ab shuġhl-e-sanam-sāzī-e-husn

āzarī sheva-e-islām huī jaatī hai

azm-e-rahrav kī girānī kā asar hai kyā ḳhuub

saḳht manzil bhī tah-e-gām huī jaatī hai

vajd kartī hai ġhazal par mirī rūh-e-'hāfiz'

ye bhī farmūda-e-‘ḳhayyām’ huī jaatī hai

allah allāh ye andāz-e-takallum 'tālib'

shā.irī aap kī ilhām huī jaatī hai

apne maqsad mein ye nakaam hui jati hai

zindagi maut ka paigham hui jati hai

be-karan talKHi-e-alam hui jati hai

jawedan gardish-e-ayyam hui jati hai

ibtida surat-e-anjam hui jati hai

har sahar mere liye sham hui jati hai

chiz jo KHas thi wo aam hui jati hai

aashiqi muft mein badnam hui jati hai

ishq mein nala-o-faryaad-o-fughan kya mani

aah bhi morid-e-ilzam hui jati hai

kya koi aur nahin yaad-e-KHuda ki surat

bandagi mashghala-e-am hui jati hai

be-KHudi ke liye saman baham hain lakhon

kyun ye paband-e-mai-o-jam hui jati hai

shauq-e-behad ki qasam zauq-e-farawan ki qasam

abhi puKHta rawish-e-KHam hui jati hai

dekh kar hazrat-e-insan ki ye KHun-ashami

maut bhi larza-bar-andam hui jati hai

ahl-e-danish jise karte hain yaqin se tabir

wo bhi min-jumla-e-auham hoi jati hai

jazba-e-shauq ko allah salamat rakkhe

kaamran hasrat-e-nakaam hui jati hai

maqsad-e-ishq ki tamir mein kya hajat-e-ghair

KHud nazar sarf-e-dar-o-baam hui jati hai

kaba-e-dil mein hai ab shughl-e-sanam-sazi-e-husn

aazari shewa-e-islam hui jati hai

azm-e-rahraw ki girani ka asar hai kya KHub

saKHt manzil bhi tah-e-gam hui jati hai

wajd karti hai ghazal par meri ruh-e-'hafiz'

ye bhi farmuda-e-‘KHayyam’ hui jati hai

allah allah ye andaz-e-takallum 'talib'

shairi aap ki ilham hui jati hai