apne markaz pe na pura hua chakkar mera

apne markaz pe na puurā huā chakkar merā

ajnabī haath badalte rahe mehvar merā

mere qālib kī shanāsā nahīñ hai.at merī

apne saa.e se bhī bezār hai paikar merā

mere siine pe to dushman kā koī zaḳhm nahīñ

mere pahlū meñ jo utrā hai to ḳhanjar merā

maiñ to ab tak nahīñ sīkhā huuñ zamīñ par chalnā

aur ḳhalāoñ meñ hai chhāyā huā shahpar merā

kis ko baḳhshā hai ḳhudāyā mirī qismat likhnā

kis ke hāthoñ meñ diyā tū ne muqaddar merā

maiñ vo sultāñ huuñ ki ghaTtī hai riyāsat jitnī

utnā utnā hī baḌhā kartā hai lashkar merā

band-e-ġham TūTne vaalā hai kisī dam 'partav'

aisā lagtā hai chhalakne ko hai sāġhar merā

apne markaz pe na pura hua chakkar mera

ajnabi hath badalte rahe mehwar mera

mere qalib ki shanasa nahin haiat meri

apne sae se bhi bezar hai paikar mera

mere sine pe to dushman ka koi zaKHm nahin

mere pahlu mein jo utra hai to KHanjar mera

main to ab tak nahin sikha hun zamin par chalna

aur KHalaon mein hai chhaya hua shahpar mera

kis ko baKHsha hai KHudaya meri qismat likhna

kis ke hathon mein diya tu ne muqaddar mera

main wo sultan hun ki ghaTti hai riyasat jitni

utna utna hi baDha karta hai lashkar mera

band-e-gham TuTne wala hai kisi dam 'partaw'

aisa lagta hai chhalakne ko hai saghar mera