apne nale mein gar asar hota

apne naale meñ gar asar hotā

qatra-e-ashk bhī guhar hotā

jin ke naame kī hai pahuñch tujh tak

kaash maiñ un kā nāma-bar hotā

dil na detā jo maiñ tujhe zālim

kyuuñ mirī jaan kā zarar hotā

phir na kartā sitam kisī pe agar

haal se mere bā-ḳhabar hotā

ḳhūn-e-ushshāq karte kyuuñ nāhaq

gar butoñ ko ḳhudā kā Dar hotā

kaam aatā maiñ ek din pyāre

rabt mujh se tujhe agar hotā

khīñchtī fauj-e-ḳhat jo husn pe teġh

siina merā hī vaañ sipar hotā

'soz' ko shauq kā'be jaane kā

hai bahut par ziyāda-tar hotā

shaiḳh mānind tere us ke paas

bār-bardārī ko jo ḳhar hotā

apne nale mein gar asar hota

qatra-e-ashk bhi guhar hota

jin ke name ki hai pahunch tujh tak

kash main un ka nama-bar hota

dil na deta jo main tujhe zalim

kyun meri jaan ka zarar hota

phir na karta sitam kisi pe agar

haal se mere ba-KHabar hota

KHun-e-ushshaq karte kyun nahaq

gar buton ko KHuda ka Dar hota

kaam aata main ek din pyare

rabt mujh se tujhe agar hota

khinchti fauj-e-KHat jo husn pe tegh

sina mera hi wan sipar hota

'soz' ko shauq ka'be jaane ka

hai bahut par ziyaada-tar hota

shaiKH manind tere us ke pas

bar-bardari ko jo KHar hota