اپنے پیروں میں لیے گرد سفر آ گیا میں

اپنے پیروں میں لیے گرد سفر آ گیا میں

غور سے دیکھ لے اے راہگزر آ گیا میں

ایک بار اور سمجھنا تھی بچھڑنے کی وجہ

چند لمحوں کے لیے بار دگر آ گیا میں

جانے کس راہ پہ نکلا تھا بھٹکنے کے لیے

جانے کس راہ سے ہوتا ہوا گھر آ گیا میں

ایک گردش لیے پھرتی ہے مجھے شام و سحر

سوچتا رہتا ہوں دن رات کدھر آ گیا میں

اب یہ محفل مجھے کس حال کو پہنچائے گی

اپنی تنہائی سے بچ کر تو ادھر آ گیا میں

آخری بنچ پہ بیٹھے ہوئے بچے کی طرح

جب مرا نام پکارا تو نظر آ گیا میں