apne pairon mein liye gard-e-safar aa gaya main

apne pairoñ meñ liye gard-e-safar aa gayā maiñ

ġhaur se dekh le ai rāh-guzar aa gayā maiñ

ek baar aur samajhnā thī bichhaḌne kī vajah

chand lamhoñ ke liye bār-e-digar aa gayā maiñ

jaane kis raah pe niklā thā bhaTakne ke liye

jaane kis raah se hotā huā ghar aa gayā maiñ

ek gardish liye phirtī hai mujhe shām-o-sahar

sochtā rahtā huuñ din-rāt kidhar aa gayā maiñ

ab ye mahfil mujhe kis haal ko pahuñchā.egī

apnī tanhā.ī se bach kar to idhar aa gayā maiñ

āḳhirī bench pe baiThe hue bachche kī tarah

jab mirā naam pukārā to nazar aa gayā maiñ

apne pairon mein liye gard-e-safar aa gaya main

ghaur se dekh le ai rah-guzar aa gaya main

ek bar aur samajhna thi bichhaDne ki wajah

chand lamhon ke liye bar-e-digar aa gaya main

jaane kis rah pe nikla tha bhaTakne ke liye

jaane kis rah se hota hua ghar aa gaya main

ek gardish liye phirti hai mujhe sham-o-sahar

sochta rahta hun din-raat kidhar aa gaya main

ab ye mahfil mujhe kis haal ko pahunchaegi

apni tanhai se bach kar to idhar aa gaya main

aaKHiri bench pe baiThe hue bachche ki tarah

jab mera nam pukara to nazar aa gaya main