apne ranj-o-gham banTe humse ba-KHabar nikle

apne ranj-o-ġham bāñTe ham se bā-ḳhabar nikle

saath chalne vāloñ meñ koī ham-safar nikle

be-sa.ādatī Thahre ḳhvāh ab hunar nikle

sab ne jis se rokā thā ham vo kaam kar nikle

ik ajiib sannāTā mahv-e-sher-ḳhvānī thā

ham jahāñ-jahāñ pahoñche ham jidhar jidhar nikle

jaane kis ke haath aa.eñ aur kyā fazā paa.eñ

phir alāmateñ ban kar mere bāl-o-par nikle

gahre pāniyoñ se kyā aur dosto miltā

merī ḳhālī āñkhoñ meñ saiñkaḌoñ bhañvar nikle

manziloñ ke pīchhe bhī aur manzileñ hoñgī

rahguzar se aage bhī koī rahguzar nikle

kā.enāt kī hastī ik fazā-e-sarmastī

jaise chāñdnī shab meñ zehn gasht par nikle

ham ne un ko dekhā hai ham ne un ko parkhā hai

jitne dīda-var nikle ḳhāse kam-nazar nikle

sirf maiñ na thā tanhā zad meñ dhuup kī aisā

merī tarah ke har-sū anginat shajar nikle

kyā bhare zamāne meñ bas yahī nahīñ mumkin

maiñ kahīñ Thahar jā.ūñ koī merā ghar nikle

dūsroñ ne kyā 'hairat' ġham ko ġham nahīñ samjhā

ham magar ġhalat nikle aur kis qadar nikle

apne ranj-o-gham banTe hum se ba-KHabar nikle

sath chalne walon mein koi ham-safar nikle

be-saadati Thahre KHwah ab hunar nikle

sab ne jis se roka tha hum wo kaam kar nikle

ek ajib sannaTa mahw-e-sher-KHwani tha

hum jahan-jahan pahonche hum jidhar jidhar nikle

jaane kis ke hath aaen aur kya faza paen

phir alamaten ban kar mere baal-o-par nikle

gahre paniyon se kya aur dosto milta

meri KHali aankhon mein sainkaDon bhanwar nikle

manzilon ke pichhe bhi aur manzilen hongi

rahguzar se aage bhi koi rahguzar nikle

kaenat ki hasti ek faza-e-sarmasti

jaise chandni shab mein zehn gasht par nikle

hum ne un ko dekha hai hum ne un ko parkha hai

jitne dida-war nikle KHase kam-nazar nikle

sirf main na tha tanha zad mein dhup ki aisa

meri tarah ke har-su anginat shajar nikle

kya bhare zamane mein bas yahi nahin mumkin

main kahin Thahar jaun koi mera ghar nikle

dusron ne kya 'hairat' gham ko gham nahin samjha

hum magar ghalat nikle aur kis qadar nikle