apne roz o shab ka aalam karbala se kam nahin

apne roz o shab kā aalam karbalā se kam nahīñ

arsa-e-mātam hai lekin fursat-e-mātam nahīñ

sirf jazb-e-shauq meñ paureñ lahū karte rahe

ham vahāñ uljhe jahāñ par koī pech o ḳham nahīñ

koī rog aisā nahīñ jo qarya-e-jāñ meñ na ho

koī sog aisā nahīñ jis meñ ki shāmil ham nahīñ

koī lai aisī nahīñ jo sarf-e-hañgāmā nahīñ

ek bhī sur zindagī ke saaz kā maddham nahīñ

ek sāvan hī nahīñ hai ḳhuuñ rulāne ke liye

apnī āñkheñ ḳhushk hone kā koī mausam nahīñ

dast-e-īsā kyā kare jab jism par rakhte haiñ ham

ek aisā zaḳhm jis kā vaqt bhī marham nahīñ

aisī tanhā.ī se to 'shahzād' mar jaanā bhalā

ek bhī dushman nahīñ aur ek bhī hamdam nahīñ

apne roz o shab ka aalam karbala se kam nahin

arsa-e-matam hai lekin fursat-e-matam nahin

sirf jazb-e-shauq mein pauren lahu karte rahe

hum wahan uljhe jahan par koi pech o KHam nahin

koi rog aisa nahin jo qarya-e-jaan mein na ho

koi sog aisa nahin jis mein ki shamil hum nahin

koi lai aisi nahin jo sarf-e-hangama nahin

ek bhi sur zindagi ke saz ka maddham nahin

ek sawan hi nahin hai KHun rulane ke liye

apni aankhen KHushk hone ka koi mausam nahin

dast-e-isa kya kare jab jism par rakhte hain hum

ek aisa zaKHm jis ka waqt bhi marham nahin

aisi tanhai se to 'shahzad' mar jaana bhala

ek bhi dushman nahin aur ek bhi hamdam nahin