apne sae se bhi Darti hai tujhe kya malum

apne saa.e se bhī Dartī hai tujhe kyā mālūm

zindagī aks badaltī hai tujhe kyā mālūm

din to sūraj hai kisī tarah se Dhal jaatā hai

raat āñkhoñ meñ Thahartī hai tujhe kyā mālūm

mere chehre pe likhe harf tū paḌh letā hai

jo mere dil pe guzartī hai tujhe kyā mālūm

ye tire naam se mansūb bhī ho saktī hai

saañs rah rah ke aTaktī hai tujhe kyā mālūm

terī dhun hai mirī pāzeb kī jhankāroñ meñ

ab to chūḌī bhī khanaktī hai tujhe kyā mālūm

tū ne jaate hue jis shaam ko chhoḌā thā yahāñ

vo sar-e-shām sañvartī hai tujhe kyā mālūm

jaane kis samt se aa jaa.e tirī yaad 'qamar'

zindagī rāsta taktī hai tujhe kyā mālūm

apne sae se bhi Darti hai tujhe kya malum

zindagi aks badalti hai tujhe kya malum

din to suraj hai kisi tarah se Dhal jata hai

raat aankhon mein Thaharti hai tujhe kya malum

mere chehre pe likhe harf tu paDh leta hai

jo mere dil pe guzarti hai tujhe kya malum

ye tere nam se mansub bhi ho sakti hai

sans rah rah ke aTakti hai tujhe kya malum

teri dhun hai meri pazeb ki jhankaron mein

ab to chuDi bhi khanakti hai tujhe kya malum

tu ne jate hue jis sham ko chhoDa tha yahan

wo sar-e-sham sanwarti hai tujhe kya malum

jaane kis samt se aa jae teri yaad 'qamar'

zindagi rasta takti hai tujhe kya malum