apne to raat din yahan aise basar hue

apne to raat din yahāñ aise basar hue

jaise kisī ġharīb ke shām-o-sahar hue

amrit-nagar kī ḳhaak ko āñkhoñ se chuum kar

mujh shā.era ke harf bhī kuchh mo'atabar hue

tū saath thā to āsmāñ the iḳhtiyār meñ

tū jā chukā to be sadā be bāl-o-par hue

kahne ko ek shaḳhs thā jo ab nahīñ rahā

kaise tumhāre shahr meñ ham dīda-var hue

vīrāñ gharoñ meñ dost kahīñ raushnī na thī

ḳhud ko jalāyā tab kahīñ raushan ye ghar hue

aksar tumhārī yaad ne kiiñ mahfileñ tabāh

aksar tumhārī yaad meñ hī diida tar hue

apne to raat din yahan aise basar hue

jaise kisi gharib ke sham-o-sahar hue

amrit-nagar ki KHak ko aankhon se chum kar

mujh shaera ke harf bhi kuchh mo'atabar hue

tu sath tha to aasman the iKHtiyar mein

tu ja chuka to be sada be baal-o-par hue

kahne ko ek shaKHs tha jo ab nahin raha

kaise tumhaare shahr mein hum dida-war hue

viran gharon mein dost kahin raushni na thi

KHud ko jalaya tab kahin raushan ye ghar hue

aksar tumhaari yaad ne kin mahfilen tabah

aksar tumhaari yaad mein hi dida tar hue