apne wadon ko faramosh na kar dena tha

apne va.adoñ ko farāmosh na kar denā thā

sāz-e-altāf ko ḳhāmosh na kar denā thā

apnī nazroñ se agar mujh ko kiyā thā ojhal

apne dil se to farāmosh na kar denā thā

nahīñ aatā thā agar hosh meñ laanā tum ko

kisī kambaḳht ko behosh na kar denā thā

har-nafas maut ke qadmoñ kī sadā sunñe ko

zindagī ko hama-tan-gosh na kar denā thā

āñsuoñ meñ faqat ab mujh ko nazar aate ho

is tarah to mujhe ġham-kosh na kar denā thā

na uThānā thā dar-e-mai-kada-e-nāz se ab

varna pahle mujhe mai-nosh na kar denā thā

hashr bhī yā to bahisht-āfrīñ karnā thā mirā

yā mirī qabr ko gul-posh na kar denā thā

is tarah zahmat-e-fardā ko baḌhāne ke liye

mujh ko ḳhamyāza-kash-e-dosh na kar denā thā

aañkh meñ dekh kar aañsū mujhe rashk aatā hai

itnā vīrān to āġhosh na kar denā thā

daftar-e-nāz pe kuchh baar na thā is kā niyāz

apne 'bismil' ko subuk-dosh na kar denā thā

apne wadon ko faramosh na kar dena tha

saz-e-altaf ko KHamosh na kar dena tha

apni nazron se agar mujh ko kiya tha ojhal

apne dil se to faramosh na kar dena tha

nahin aata tha agar hosh mein lana tum ko

kisi kambaKHt ko behosh na kar dena tha

har-nafas maut ke qadmon ki sada sunne ko

zindagi ko hama-tan-gosh na kar dena tha

aansuon mein faqat ab mujh ko nazar aate ho

is tarah to mujhe gham-kosh na kar dena tha

na uThana tha dar-e-mai-kada-e-naz se ab

warna pahle mujhe mai-nosh na kar dena tha

hashr bhi ya to bahisht-afrin karna tha mera

ya meri qabr ko gul-posh na kar dena tha

is tarah zahmat-e-farda ko baDhane ke liye

mujh ko KHamyaza-kash-e-dosh na kar dena tha

aankh mein dekh kar aansu mujhe rashk aata hai

itna viran to aaghosh na kar dena tha

daftar-e-naz pe kuchh bar na tha is ka niyaz

apne 'bismil' ko subuk-dosh na kar dena tha