apni aankhon se tabahi ye nazara dekhun

apnī āñkhoñ se tabāhī ye nazāra dekhūñ

yā'nī tujh ko maiñ kisī aur kā hotā dekhūñ

merī dīvāngī is moḌ pe le aa.ī hai

har kisī chehre meñ bas ek hī chehra dekhūñ

ye jo tasvīr musavvir ne banā.ī varna

chāñd ko Thahre hue paanī meñ chaltā dekhūñ

tishnagī laakh sahī par ye nahīñ ho saktā

ḳhud ko lāchār banā.ūñ sū-e-dariyā dekhūñ

ye tirī zid ki taḌaptā huā dekhe mujh ko

merī ḳhvāhish ki hamesha tujhe hañstā dekhūñ

sāmne tujh ko biThā.ūñ tirā māthā chūmūñ

terī āñkheñ tirī zulfeñ tirā chehra dekhūñ

do qadam chal ke ye dil ne kahā 'ādil-rāhī'

āḳhirī baar palaT kar use jaatā dekhūñ

apni aankhon se tabahi ye nazara dekhun

ya'ni tujh ko main kisi aur ka hota dekhun

meri diwangi is moD pe le aai hai

har kisi chehre mein bas ek hi chehra dekhun

ye jo taswir musawwir ne banai warna

chand ko Thahre hue pani mein chalta dekhun

tishnagi lakh sahi par ye nahin ho sakta

KHud ko lachaar banaun su-e-dariya dekhun

ye teri zid ki taDapta hua dekhe mujh ko

meri KHwahish ki hamesha tujhe hansta dekhun

samne tujh ko biThaun tera matha chumun

teri aankhen teri zulfen tera chehra dekhun

do qadam chal ke ye dil ne kaha 'adil-rahi'

aaKHiri bar palaT kar use jata dekhun