apni aankhon se to dariya bhi sarab-asa mile

apnī āñkhoñ se to dariyā bhī sarāb-āsā mile

jo bhī naqd-e-jāñ luTāne aa.e ham se aa mile

ab vafā kī raah par har samt sannāTā mile

ahl-e-dil ke kārvāñ kin manziloñ se jā mile

lap pe gar naġhma nahīñ palkoñ pe hī taarā mile

gul nahīñ khilte to koī zaḳhm hī khiltā mile

rañg-o-bū ke pairahan meñ phuul haiñ yā zaḳhm haiñ

ab na vo kaliyāñ na vo patte na vo saayā mile

imtihāñ thā maslahat thī yā mirī taqdīr thī

maiñ gulistānoñ kā tālib thā mujhe sahrā mile

umr-bhar har ek se maiñ ne chhupā.e dil ke daaġh

aaj ye hasrat ki koī dekhne vaalā mile

maiñ ne jin āñkhoñ meñ dekhe the samundar maujzan

un meñ jo bhī Dūbne vaalā mile pyāsā mile

naaz us kā pāsbāñ andāz us kā ham-zabāñ

ḳhalvatoñ meñ bhī vo mujh se anjuman-ārā mile

aaj phir chheḌuñgā maiñ mahtāb kī kirnoñ ke taar

kaash imshab to mile yā koī tujh jaisā mile

aañkh sau rañgoñ kī tālib hosh sau rañgoñ kā zaḳhm

dil ko ye zid hai ki terī aarzū tanhā mile

ajnabī rāheñ bhī 'sādiq' ajnabī rāheñ na thiiñ

jab kisī ke jāne-pahchāne nuqūsh-e-pā mile

apni aankhon se to dariya bhi sarab-asa mile

jo bhi naqd-e-jaan luTane aae hum se aa mile

ab wafa ki rah par har samt sannaTa mile

ahl-e-dil ke karwan kin manzilon se ja mile

lap pe gar naghma nahin palkon pe hi tara mile

gul nahin khilte to koi zaKHm hi khilta mile

rang-o-bu ke pairahan mein phul hain ya zaKHm hain

ab na wo kaliyan na wo patte na wo saya mile

imtihan tha maslahat thi ya meri taqdir thi

main gulistanon ka talib tha mujhe sahra mile

umr-bhar har ek se main ne chhupae dil ke dagh

aaj ye hasrat ki koi dekhne wala mile

main ne jin aankhon mein dekhe the samundar maujzan

un mein jo bhi Dubne wala mile pyasa mile

naz us ka pasban andaz us ka ham-zaban

KHalwaton mein bhi wo mujh se anjuman-ara mile

aaj phir chheDunga main mahtab ki kirnon ke tar

kash imshab to mile ya koi tujh jaisa mile

aankh sau rangon ki talib hosh sau rangon ka zaKHm

dil ko ye zid hai ki teri aarzu tanha mile

ajnabi rahen bhi 'sadiq' ajnabi rahen na thin

jab kisi ke jaane-pahchane nuqush-e-pa mile