apni aashufta-bayani mein zarur aaega

apnī āshufta-bayānī meñ zarūr aa.egā

tazkira pyaas kā paanī meñ zarūr aa.egā

dekhne vāloñ ko ehsās-e-ġham-e-zāt nazar

lafz ke bahr-e-ma’ānī meñ zarūr aa.egā

zehn-o-dil jis kī kashākash meñ ulajh jā.eñge

faisla aisā javānī meñ zarūr aa.egā

jab nazar aa.egā har rāsta dushvār hameñ

phir nayā moḌ kahānī meñ zarūr aa.egā

jab likhā jaa.e kabhī qissa-e-arbāb-e-shu’ūr

naam apnā bhī nishānī meñ zarūr aa.egā

mere e’jāz-e-suḳhan meñ mirā tābinda ḳhayāl

jazba-e-nūr-fishānī meñ zarūr aa.egā

apni aashufta-bayani mein zarur aaega

tazkira pyas ka pani mein zarur aaega

dekhne walon ko ehsas-e-gham-e-zat nazar

lafz ke bahr-e-ma’ani mein zarur aaega

zehn-o-dil jis ki kashakash mein ulajh jaenge

faisla aisa jawani mein zarur aaega

jab nazar aaega har rasta dushwar hamein

phir naya moD kahani mein zarur aaega

jab likha jae kabhi qissa-e-arbab-e-shu’ur

nam apna bhi nishani mein zarur aaega

mere e’jaz-e-suKHan mein mera tabinda KHayal

jazba-e-nur-fishani mein zarur aaega