اپنی آواز کو اوروں سے ملانے والے

اپنی آواز کو اوروں سے ملانے والے

تیری پہچان مٹا دیں گے زمانے والے

میرے خوابوں سے ترا کوئی تعلق ہی نہیں

کیوں پریشان ہے تعبیر بتانے والے

مکڑیاں اب نہ دہانوں پہ بنیں گی جالا

غیر محفوظ ہیں سب غار میں جانے والے

اپنے ورثے کے چراغوں کو جلاتے ہی نہیں

خواہش نور بھی رکھتے ہیں زمانے والے

سانحہ ایک ہی لمحے کے لیے آتا ہے

عمر کٹ جائے گی وہ لمحہ بھلانے والے

کس طرح اپنی مسافت کو مکمل کرتا

اس سے آگے تھے نشاں اس کو مٹانے والے

اس کی پلکیں نہ چھلک آئیں جواباً شاہدؔ

اس لیے اشک چھپاتے ہیں ہنسانے والے