apni ana se bar-sar-e-paikar main hi tha

apnī anā se bar-sar-e-paikār maiñ hī thā

sach bolne kī dhun thī sar-e-dār maiñ hī thā

sāzish rachī ga.ī thī kuchh aisī mire ḳhilāf

har anjuman meñ bā.is-e-āzār maiñ hī thā

sau kartaboñ se zaḳhm lagā.e ga.e mujhe

shāyad ki apne ahd kā shahkār maiñ hī thā

lamhoñ kī bāz-gasht meñ sadiyoñ kī guuñj thī

aur āgahī kā mujrim-e-iz.hār maiñ hī thā

tahzīb kī ragoñ se Tapakte lahū meñ tar

dahlīz meñ paḌā huā aḳhbār maiñ hī thā

'ajmal' safar meñ saath rahīñ yuuñ sa.ūbateñ

jaise ki har sazā kā sazā-vār maiñ hī thā

apni ana se bar-sar-e-paikar main hi tha

sach bolne ki dhun thi sar-e-dar main hi tha

sazish rachi gai thi kuchh aisi mere KHilaf

har anjuman mein bais-e-azar main hi tha

sau kartabon se zaKHm lagae gae mujhe

shayad ki apne ahd ka shahkar main hi tha

lamhon ki baz-gasht mein sadiyon ki gunj thi

aur aagahi ka mujrim-e-izhaar main hi tha

tahzib ki ragon se Tapakte lahu mein tar

dahliz mein paDa hua aKHbar main hi tha

'ajmal' safar mein sath rahin yun saubaten

jaise ki har saza ka saza-war main hi tha