apni bahaar pe hansne walo kitne chaman KHashak hue

apnī bahār pe hañsne vaalo kitne chaman ḳhāshāk hue

apne rafū ko ginñe vaalo kitne garebāñ chaak hue

dīvānoñ ko kaun batā.e aaj kī rasm aur aaj kī baat

is ne unhīñ kī samt nazar kī ishq meñ jo bebāk hue

sho.abada-e-yak tarz-e-karam hai kaisī sazā aur kaisī jazā

mauj-e-tabassum jab lahrā.ī tar-dāman bhī paak hue

ruḳh dekhā jis samt havā kā us jānib muñh kar ke chale

dasht-e-junūñ ke dīvāne bhī misl-e-sabā chālāk hue

ḳhāk-e-nasheman jab uḌtī hai dil se dhuāñ sā uThtā hai

hādse is gulzār meñ varna aur bahut ġhamnāk hue

dekhte dekhte duniyā badlī gulshan kyā vīrāna kyā

parbat parbat naqsh the jin ke miTte miTte ḳhaak hue

jān-e-chaman jo gul the 'aḳhtar' vo to hue ma.atūb o zalīl

zeb-e-gulistāñ raunaq-e-gulshan kal ke ḳhas-o-ḳhāshāk hue

apni bahaar pe hansne walo kitne chaman KHashak hue

apne rafu ko ginne walo kitne gareban chaak hue

diwanon ko kaun batae aaj ki rasm aur aaj ki baat

is ne unhin ki samt nazar ki ishq mein jo bebak hue

shoabada-e-yak tarz-e-karam hai kaisi saza aur kaisi jaza

mauj-e-tabassum jab lahrai tar-daman bhi pak hue

ruKH dekha jis samt hawa ka us jaanib munh kar ke chale

dasht-e-junun ke diwane bhi misl-e-saba chaalak hue

KHak-e-nasheman jab uDti hai dil se dhuan sa uThta hai

hadse is gulzar mein warna aur bahut ghamnak hue

dekhte dekhte duniya badli gulshan kya virana kya

parbat parbat naqsh the jin ke miTte miTte KHak hue

jaan-e-chaman jo gul the 'aKHtar' wo to hue matub o zalil

zeb-e-gulistan raunaq-e-gulshan kal ke KHas-o-KHashak hue